点击下方收听音频，时长10分20秒
搭大家一道来传承母语，欢迎来到吴语书院，各位朋友大家好，我是波奇爷叔，又到了东周列国志栏目，继续搭大家讲烽火戏诸侯故事，上趟讲到太子贬到申国,申后含泪度日。 今朝讲第三部分：千金一笑天子买计，烽火狼烟诸侯徒劳。
褒姒呢也进宫几亇号头了，宫涅是神魂颠倒，天天拿伊捧勒手心里，但是怪了，箇褒姒是从来呒没笑过。宫涅就问了：“爱卿啊，侬何故笑口勿开啊？”褒姒讲：“启禀王上，臣妾生来就勿会笑，我也勿懂是何缘故。”
宫涅一想，箇记麻烦了，我周王亇女人一直勿笑，我面子夹里勿是侪没了，豪稍就拿乐工舞姬通通召到琼台，呜钟起舞品竹弹丝大勤共一场，想博得褒姒欢心一笑。没想到褒姒无动于衷，只面孔像铁板新村一样，毫无表情。
幽王一计勿成再生一计：“爱卿啊，朕搭侬一道亇辰光也勿长，勿晓得侬平常有啥爱好啊？”褒姒就讲：“臣妾自幼家贫，呒啥爱好，就只是勒溪边浣纱，听听小桥流水，也就心满意足了。”
宫涅一想箇便当，马上喊人叫来民工，勒琼台旁边开小溪，种杨柳，叠假山，一片田园风光，箇记周王赛过是苏州园林开发商哉。
工程搞定，宫涅兴致勃勃亇领之褒姒来欣赏伊亇佳作，呒没想到褒姒看了还是面无表情冷若冰霜，乃末箇记周王头浑了。
宫涅想想，箇恁搞下去也勿是生意经，隔手第二天早朝，索性晓谕百官：“众位爱卿啊，啥人有本事逗褒姒一笑，朕就赏赐千金。”群臣一听侪面面相觑，默勿作声，也没人敢当场发表啥意见。
散朝之后，虢石父进宫面见，搭幽王讲：“参见陛下，臣有一计。勿知当讲勿当讲。幽王一听：侬只虢石父，朕就晓得侬花头经顶透，快眼讲，覅摆花板。听幽王迭能讲法，虢石父就得意洋洋亇开始开无轨电车了：先王年间因为西戎强盛，恐伊入寇，就勒俪山置办烽火台廿余所，铜鼓数十架，只要发现蛮夷入寇华夏，就点起狼烟直冲云霄，敲响大鼓声势震天，附近诸侯定会发兵相救。数十年以来，天下太平，烽火台长远没用哉。王上若要娘娘启齿一笑，就同伊游俪山，放烟擂鼓，诸侯援兵必至，至而无寇，娘娘一看必笑无疑。”幽王一听：“好侬亇虢石父，套路是多。”乃末好了箇种恶形恶状亇办法也只有虢石父想得出来，也只有幽王听得进去。
第二天，幽王就命令安排车辇，带之褒姒到骊山白相。心里暗暗叫想：箇趟我一定要叫侬笑出来哈哈哈。箇幽王一边想一边伊自家倒先笑了，唉，真是没办法。英雄难过美人关，勿对，箇幽王也勿是英雄，横竖是搞勿好了，真真急煞人。
到了骊山，幽王一面传令大摆筵席，一面派人按照虢石父计划悄悄行事。
筵席开始，褒姒正要搭幽王举杯饮酒，垃陌生头骊山鼓声如雷，烽火冲天，乃末搞大了，廿几只烽火台一道放烟火炮仗了，箇种场面褒姒是从来呒没见识过，幽王箇记下血本了。
忠诚郑伯友正勒朝中，大惊失色，豪稍快马加鞭赶到骊山：“王上啊，烽火台乃先王所设取信于诸侯以备急用，如今无故举烽，等于是戏弄诸侯。今后倘有勿虞，再举烽火，诸侯必定勿信。到辰光靠啥人再来救急？”幽玉一听勿耐烦了：“乃朝天下太平，爱卿侬覅触朕霉头。朕今朝搭夫人出游俪官，呒啥物事好消遣，就搭诸侯白相相。反正也搭各地宗亲长远勿见了，就当联络联络感情好了，下趟真亇有事体，也搭爱卿侬无关！”
话分两头，镐京附近亇各路姬姓诸侯，远远叫看见烽火直冲云霄，疑镐京有变，以为周王遇险，一个一个慌忙点将领兵，连夜赶至俪山，赶来救驾。
啥人晓得赶到骊山，只闻楼阁管箭之音，只见幽王褒妃饮乐，歌舞升平，并勿见蛮夷一兵一卒。弄得各路诸侯是侬看我，我看侬，侪面面相觑，勿知所措。
等到各路诸侯到齐了，幽王笃悠悠亇跑到高台，挥了挥手：“各位宗亲，乃朝天下太平，朕交关辰光没看到各位了，甚是想念啊，故咾请大家来跑一埭增进增进感情，各位侪辛苦了。”
听周王箇恁讲，各种诸侯再晓得是拨姬宫涅白相了一记，大家侪哭笑勿得，只好偃旗息鼓打道回府各回封地。褒姒看到伊拉来也匆匆，去也匆匆，觉着箇幽王是蛮会污搞百叶结，就勿禁笑了起来。
褒姒一笑，幽王大喜：“爱卿一笑，百媚俱生，侪靠虢石父只赤佬想亇高招啊，哈哈哈。”马上就命人扛出一千两黄金，赏拨虢石父。现在阿拉俗语相传亇“千金买笑”，就是盖本于此。好，今朝故事就讲到此地，欲知后事如何呢，请关注吴语书院公众号，听波奇爷叔下回分解。