点击下方收听音频，时长9分30秒
搭大家一道来传承母语，欢迎来到吴语书院，各位朋友大家好，我是波奇爷叔，又到了东周列国志栏目，继续搭大家讲烽火戏诸侯故事，上趟讲到洪德拿褒姒献拨幽王，幽王惊为天仙 ，当场释放褒珦。今朝讲第二部分：天子宫涅沉迷褒姒，太子宜臼为母出气。
幽王箇记美女着港，邪气称心如意，越看越欢喜，索性也勿通报申后知晓，直接留褒姒于别宫，夜里同寝享鱼水之乐。两介头高居琼台之上，坐则叠股，立则并肩，饮则交杯，食则同器，醉生梦死，一连十日天，勿早朝，日脚交关好过啦。
大约摸三个号头，群臣早朝勿见，王后之宫勿进，大家侪当幽王勒塰做百日了。。。众人面面相觑无勿叹息。有人报予申后，如此如此一番描述，申后是艴然勿悦。
申后拣之一日，带牢宫娥，径到琼台去寻幽王，申后想我倒要去张张看，两只赤佬成日成夜勿晓得勒塰高头搞啥百叶结。
申后跑到琼台，褒姒搭幽王正好勒塰岁月静好。褒姒也勿晓得是王后来了，呒没起身迎接，继续看牢眼花动也勿动。
申后一看褒姒介笃定，册那还摆架子存心怠慢我咾，乃末火气一上来。直接山门骂上去：“嚡里来亇小娘鬼，呒规呒矩，惑乱宫阑，招呼也勿打一声，当我王后是假亇啊！”幽王生怕申后动手，豪稍攩勒褒姒前头讲：“王后覅光火，伊是朕新纳亇美人，位次还没定好，故咾没去朝见。”申后听幽王箇恁讲也勿好再发作，只好闷进，索介响也勿响直接拂袖而去。幽王就搭褒姒讲：”侬明朝拣个辰光去拜见王后，伊肯定吃醋了。“褒姒哑口无言，到之第二天还是没去朝见正宫。
申后回宫以后，心烦意乱叹息勿已。太子宜臼看到就讲了：“母后侬贵为六宫之主，何故闷闷勿乐？”申后就讲：“侬父王专宠褒姒，嫡庶勿分，其若得志，阿拉母子就没立足之地了！”就拿褒姒勿来朝见，今朝存心怠慢亇过程讲了一遍。宜臼听了勿以为然：“箇事体便当，我来搞定。明朝是朔日，父王肯定要上朝。母后就让宫人去琼台摘花，引箇贱婢出来，儿臣就趁机刮伊一顿，帮母后出口气。就算父王责怪下来，罪责在我，搭母后无关。”申后豪稍叮嘱儿子：“侬千万覅轻举妄动，此事从长计议为好。”
第二天，幽王果然出朝搭群臣一道贺朔。宜臼暗中调遣东宫宫娥跑到琼台瑶圃，勿分青红皂白，一顿乱摘，搞得琼台是漫天花舞，一天世界。
琼台宫娥发现情况勿妙，出来阻挡：“瑶圃花朵是王上亲自安排栽种，拨褒娘娘赏玩，啥人无法无天，敢来瞎摘八摘！”东宫宫娥老实勿客气就还击伊：“阿拉奉了东宫令旨，要采花供给拨正宫娘娘，啥人敢来阻挡！”
褒姒听到争吵声音，跑出来一看，箇记是怒从心头起恶向胆边生，正要发作，勿料太子突然而至，一把抓牢伊亇乌云宝髻，褒姒毫无堤防。箇宜臼看到褒姒是仇人相见，分外眼红，破口大骂：“侬只贱骨头！勿去拆泡尿照照自家是啥亇货色？无名无份，也敢目中无人妄称娘娘，今朝我让侬好好叫认得认得我！”一面骂一面拳头直接就揎了上去。乃是煞煞搏搏一顿暴打。
旁边宫娥一看事体搞大了，一道跪下来磕头讨饶：“太子千岁啊，快眼停手，孬再打了，万事要看王上面子！”宜臼一听也怕真亇打出人性命，顺势当场停手，拍拍屁股扬长而去。褒姒含羞忍痛，两行流泪，晓得太子今朝是帮娘出气，存心来寻伊齁势。宫娥勒旁边劝伊：“娘娘勿要悲泣，自有王上作主。”
话音未落，幽王退朝直冲琼台，真亇是一日勿见兮，如隔三秋兮。没想到褒姒两鬓蓬松，眼泪汪汪，就问了：“爱卿啊，侬今朝哪恁还没梳妆打扮？”褒姒拉牢幽王袖子管穷哭：“太子今朝带之宫娥来瑶圃摘花，看到臣妾就打，要勿是宫娥苦劝肯定性命难保，王上要帮我作主！”
箇幽王心里倒也清爽，搭褒似讲：“爱卿啊，侬勿去朝见王后乃出事体了，箇是王后主意，也覅多怪太子了。褒姒讲：”太子今朝要打煞臣妾。小君死勿足惜，但是现在已经身怀六甲，求王上放小君出宫，保全母子性命。“幽主一听乃末急了，拨转屁股就去寻宜臼算账。
幽王当即传旨：”太子宜臼，好斗无礼，忤逆犯上，即发申国，未得征召，勿得回朝。东宫太傅，辅导无能，一并削职。“
太子想进宫辞别母后，幽王吩咐宫门勿许通报放行，宜臼只好遵旨去了申国。申后长远勿见太子进宫，一问再晓得儿子已经拨贬到申国。乃伊是孤掌难鸣，终日怨夫思子，含泪度日啊。
好，今朝故事就讲到此地，欲知后事如何呢，请关注吴语书院公众号，听波奇爷叔下回分解。