点击下方收听音频，时长14分23秒
搭大家一道来传承母语，欢迎来到吴语书院。
各位朋友大家好，我是波奇爷叔，今朝我开一档故事栏目，讲讲东周列国亇一眼小故事。为啥要讲东周时代亇故事呢？我认为，春秋战国时期呢是我国历史塱一个既混乱又精彩亇时期，奴隶制社会开始瓦解，新亇封建社会制度开始形成。西周灭亡以后呢，延续亇是东周，东周礼乐崩坏，经过长达几百年连绵弗断亇内部战争，各地诸侯称霸一方大肆兼并。春秋五霸战国七雄先后登上了历史舞台，箇个舞台塱有倾国倾城亇美女，有力能举鼎亇壮士，有精于兵法亇将军，也有心怀鬼胎亇奸人。当然咾还有交关有名亇谋略家，搭之昏庸无能或者呢精明强干亇君主，箇眼人物一道组成了一个精彩亇场面。另外我认为阿拉现在交关成语典故也是出于伊个辰光，通过箇眼故事让大家能够更加好亇了解箇眼成语亇由来。外加东周故事里，有交关姓氏搭之地名里向有生僻字，箇眼生僻字放勒平常大多数侪读弗连牵，故咾我也欢喜做个尝试，有读得弗对亇地方，欢迎朋友留言指正。好，乃接下来，我要讲亇故事叫作烽火戏诸侯。
今朝讲亇是第一部分：无道幽王下诏选美 忠良褒珦进言获罪。
箇只故事发生勒公元前七百多年，西周传到了幽王箇代。有一年褒城久旱弗雨，五谷弗收，故末老百姓也呒啥物事好吃，只好弄眼树皮草根来触祭，着亇是破衣烂衫，没饿煞已经算蛮好了。
但是，箇幽王反而暴戾无情，荒淫无道，成日成夜搿牢之艳姬宠妃，狂歌酣舞，弗理朝政，哪能还会得有心思去管小老百姓亇死活呢！
既然天子只晓得贪酒好色，故末臣子当中呢自然也会得有人专门巴结逢迎。大臣虢石父搭祭仲还有尹球就是箇票里货色，伊拉非但弗规劝幽王，反而一道商量征选美女来投其所好。
三个人商量好之计划，就去面奏幽王，箇能亇奏章幽王看之是笑逐颜开，一奏就准啊。当场拍板，叫虢石父传谕天下，乃末好了，市面塱漂亮个小姑娘侪要拨伊列入册籍，送到王宫。
箇虢石父领之圣旨出宫，勒了通衢大道塱到处张贴榜文征选美女，啥人屋里向有美女弗上报就判死刑。
同样亇榜文也传到了褒城，伊面亇老百姓侪饿之肚皮愁眉苦脸，本生侪盼望幽王好开仓济贫，没想到幽王非但弗雪中送炭，反而雪上加霜。大家是侬怒我怨啊，没人肯拿囡儿搭之姊妹送到宫里向去。
当地有名望亇几个父老看到箇种情况商量好之一道去寻大夫褒珦，请伊到镐京跑一埭，奏请幽王拿开仓赈灾亇事体摆勒前头。拿选美充宫亇事体先搁一搁。
褒珦正好为之箇桩事体勒塰愤愤弗平。听了几位父老讲起老百姓啼饥号寒亇凄惨景象，故末更加同情了，也就一口答应下来，让伊拉各自回家静候佳音。
褒珦送走了几位父老,乃末匆匆忙忙拿褒城个事体交代拨伊夫人搭之儿子洪德，外加对伊拉讲：幽王迭个人啊喜怒无常，箇趟我去估计是凶多吉少，万一遭遇弗幸末，请㑚设法营救。
乃末到了第二天，褒珦呢就命令家臣褒义安排车马，启程上路。
褒珦快马加鞭，赶到镐京面见幽王，忠言直谏，劝伊勤政恤民，发粮救灾，求贤才而弗访美女。讲出亇言话，一句句侪触幽王亇心筋。
幽王正勒兴头塱，垃陌生头拨褒珦一记冷水浇头，劈头劈脑请伊吃了一顿牌头 ，箇交关败兴啊。乃末幽王穷光火了，责备褒珦违忤圣旨，命令武士拿伊推出去斩首。
忠臣郑伯友搭褒珦相处甚厚，一看到要杀褒珦，豪稍出班拼死保奏，幽王再稍稍息怒，饶了褒珦亇死罪，命令武士拿伊打入天牢，褒城何里一天送来绝色美女，褒珦就何里一日释放。
褒义等勒宫门外，从早塱向等到夜快头，还没看到褒珦出来。一打听，再晓得已经钉牢收监，要等褒城送来美女再能赎罪。伊快马加鞭，豪稍赶回褒城送信。
洪德搭伊姆妈听到凶信，大吃一惊。洪德绞尽脑汁想之半日天，别无妙计，只好劝姆妈覅急，自家马上就去寻访美女，好赎阿爸出狱。
洪德勒褒城跑遍弄堂马路，也没碰着一个绝色美女，懊恼得弗得了，就信步跑到城外。刚到郊外弗远，就看到一群村姑正好勒了田横头剜菜。
洪德跑到前头，一一觑看。只见当中有一个着黄衣素裙亇小姑娘，饥寒夺弗脱伊亇清秀，穷苦遮弗牢伊亇娇艳，真正称得上是画匠难描，弗禁大喜。
伊想先问问看小姑娘亇身家姓名，刚刚准备上去搭讪，突然一记村头柴门一开，有人喊了一声“褒姒”。箇小姑娘就应之一声，拎好篮头回屋里去了。
洪德就近一打听，原来褒姒是褒大亇养女，芳龄十七。伊就跑进村庄，推开柴门去拜访褒大。褒大一看来亇是贵人，豪稍上前迎接。
洪德见了褒大夫妇，先从农桑事体讲起，然后转入正题。箇褒大只是一个平民百姓，听讲选美是奉幽王之命，又有官家来求，沉吟片刻，只好答应。洪德看到褒大答应了，开心得拱手称谢，就搭褒大约好明朝来接褒姒。
褒大送好洪德，就拿箇桩事体告诉褒姒。褒姒一听，摒弗牢落眼泪了。老夫妻当之是囡儿弗舍得爷娘，离弗开故乡，哪能晓得伊是另外有一桩心事。
原来褒姒呢虽未婚配，但是伊搭村里向一个小青年，私下头两情相悦，两家头正好勒嗨计划以后要恩恩爱爱夫唱妇随，呒没想到碰着迭个弗测风云。箇一夜天，两个人约勒村外相会真正是难舍难分，但是呢又弗敢违抗王命。
第二天一早，洪德备好车马来接，褒姒只好熬牢悲伤搨脂抹粉，含之眼泪着好锦衣绣裙，一步一停捱上车子。箇小青年也轧勒众人里向一道来送伊，弄得褒姒是心如刀割。
车马越走越远。褒姒仔细听，听弗到亲人唤；回头望，也望弗到旧家园。从此落花离枝，邪气愁苦。
车行一日，到之镐京。洪德献上金银财礼买通虢石父，打通关节由伊引见幽王。
洪德带牢褒姒觐见幽王。幽王低头一望，一记头神魂颠倒，惊为天仙美女啊，乃伊是开心得来亲自步下金阶来扶褒姒。
既然美女到手，幽王想想也要讲信用咾，就叫虢石父传谕，释放褒珦出狱。外加还要让洪德加官进爵。洪德救爷要紧根本没心思当官，当场叩头辞谢而去。
好，今朝故事就讲到此地，欲知后事如何，请关注吴语书院公众号，听波奇爷叔下回分解。