点击下方收听音频，时长14分42秒
上趟，吴语书院发布了上海闲话ABC亇“《文白异读层次类型详析》之四”，大家是否还有印象？本期接续上趟亇文章。
注：本文拼音方案是拉丁式拼音，搭书院拼音不同，阅读亇辰光请注意。
-h表示上去合声（否则-r表示去声，本文勿分上去声）。
质疑文读音合理性亇例子还有译音字。比如讲“加减乘除”亇“加”亇文读音，除脱满足文读迷亇爱好以外，其实是毫无必要亇。文读迷甚至垃拉读“伏特加”、“加利福尼亚”、“加拿大”等词汇亇辰光，也使用文读仿北音cia。稍为懂眼外语亇朋友晓得，“伏特加vodka”亇最后一个音节亇俄语读音，“加利福尼亚california”亇第一个音节亇西班牙语读音，“加拿大canada”亇第一个音节亇法语发音；全是“加”字亇自身白读音“ka”，就算调成英语亇送气清音，也不过是“卡kha”要么“开khe”，搭之“加”字亇文读音，就是普通言话亇cia/tɕjɑ/是浑身勿搭界亇。又有“沙特Saudi”本生也是一个上海言话译音亇词汇，注意“特别”亇“特” 亇读音是浊音哦，也有文读迷生造仿北文读音，拿“沙特”读成“杀脱”。拿“沙特阿拉伯”讲成“杀脱阿拉爸”。迭桩事体，还拨编写成搞笑段子。既然大量亇上海言话翻译亇词汇，普通言话可以直接按照普通言话自家亇习惯读得搭之原来词汇勿一样，故末我伲也没理由看到外来词汇就迁就普通言话亇读音。
除脱近代译音字，古代也有译音字。比如“般若”应该哪恁读亇问题。 “般若”对应梵语Prajñā、巴利语：paññā。 （“若”字：【广韵】人者切，音惹。）此地显然白读音gniah比文读音zaq更加确切。毕竟一般性来讲，白读音比文读音更加符合古音。 “般若”是中古汉语翻译亇，勿是普通话翻译亇。箇“若”亇【广韵】同音字“惹”，“惹气”亇“惹”，有个组词叫“娘惹”，相对我伲来讲也属于生僻词汇，是对应马来语亇Nyonya。同样道理，此地应该也是白读音gniah比较合适。吴语亇白读相对文读仿北音勿光搭古汉语，搭南方闽方言关系也是要密切一眼亇。
一般性来讲，白读音比文读音更加存古。迭一个事实也冲击“生僻字使用文读仿北音”亇思维定式。比如：“虓（猇）”字，是晓母或匣母效摄二等平声字，本生有清浊两读，文读音要么xio要么yo，白读要么ho要么ro。箇个“虓”本生是模拟虎啸亇发音。明显白读更加符合虎啸声。联绵词“沆瀣”本生是露气亇意思，又有成语“沆瀣一气”。 “瀣”文读仿北音是ya，要是采用白读ra，搭“沆ran”发音就更加接近，双声效果就更加好，尤其是更加接近古音，更加有点原汁原味亇意思。
《上海市区方言志》记录“寨”字呢有zeh、tzeh两个读音。 “寨”字是【广韵】崇母蟹摄开口二等去声，搭之平声亇“柴爿”亇“柴”字只是一个声调问题。就是箇个“寨”字啊，自源层规则读音应该是(d)zah。迭只读音，现实当中是已经拨边缘化出局了。 zeh、 tzeh亇韵母是个仿北音，就是文读音。老文读，就是低仿版亇文读还保留了箇个浊音声母。评书里头讲着亇“压寨夫人”习惯用迭个读音。而新文读，就是高仿文读是“农业学大寨”亇时代形成亇，主要用于“大寨”一词。近些年来呢，出现亇新词汇“山寨zah版”，民间有人读成“山tzah”亇。普通话ai韵母亇字，上海言话蛮多读a韵母。箇恁介呢有人就类推出a韵母来。迭个“寨tzah”读音亇韵母是齐巧回归了白读层，可惜声母没恢复为浊音，否则我是绝对无条件支持亇。既然仿北文读音地位动摇了，我伲是应该努力稳定一个低仿或者高仿亇北方言话读音还是趁机恢复自源层规则读音(d)zah呢。
“和谐社会”亇“谐”应该推荐嚡里一个读音，是我曾经烦恼过亇一个难题啦。白读是比较简单亇。 “谐”字【广韵】戸皆切，蟹开二平匣，搭“鞋子”亇“鞋”同音。普通言话“鞋子”亇“鞋”跟“和谐”亇“谐”两个字也是同音字。白读规则读音呢就是ra，箇是比较简单亇。文读音是啥呢。按照见系二等加i介音，就是ya，但是参考“机械”亇“械”应该是ye，参考“冶金”亇“冶”应该是yi、参考“携带”亇“携”应该是yij。文读也勿定规保留浊音声母。参考“霞ia/ʔjɑ/”、“幻uaeh/ʔwɛ:/”、“缓ueuh/ʔwø:/”等字，“匣”母文读可以是“影/ʔ/”母，就是〇声母。参考“懈怠”亇“懈”应该是xia，而叶进先生垃拉“阿拉乓乓响”节目里向讲：箇个“谐”文读音就是xie。文读亇最高形式就是普通话。但是文读音亇忠实支持者，就是脑残粉啦，是勿承认文读音是搭普通言话搭界亇，故咾伊拉是勿接受高仿版亇文读音亇，欢喜学得四勿像亇低仿版亇文读音亇。道理是明显亇，立垃保护方言亇立场塱向是没理由支持大量引进普通话亇读音亇，正是因为文读迷搞勿清爽文读音就是模仿北方言话亇读音，再会得支持文读音，否则要么像我迭恁倾向白读音，要么直接当推普机了。文读音是旧文教体系下地位高亇读音，要是没社会地位就勿可以是文读音。选择嚡里一个文读音，估计也是难摆平亇。反过来讲，既然社会塱向没固定习惯，我伲阿有必要去推广一个仿北音呢。故咾，经过思想塱向多次反覆斗争，我最后决定就推广自源层规则白读音，勿再去寻求权威仿北音了。
对于文读音亇追求造成混乱亇，还有个例子可以讲一讲亇，就是“解”姓。迭个是一个多音字，读姓氏亇辰光应该是“胡买切”同箇个“大闸蟹”亇“蟹”一个音。 “蟹”虽然本生是个浊音字，但是今朝普遍读清音。有种说法，上声上古字是带清喉塞音/ʔ/亇，迭个音拿部分匣母上声字清化了。今朝普通言话“解”姓搭“蟹”还是同音亇。上海市区亇方言资料中，我没查到迭个“蟹姓”读音记录。但是，其它吴语方言点亇资料可以佐证“蟹姓”本生读同“蟹”。 （《松江方言志》解姓读har，但是阴去声。郑张尚芳《汉语方言异常音读的分层及滞古层次分析》记录温州话“蟹”“解（姓）”读ha。）就是“解姓”白读音是明确亇。但是箇个“解姓”是一个勿常见姓氏，读音勿容易固定下来。水浒人物有“解珍、解宝”兄弟，曲艺界读到迭个姓，读法是五花八门亇，yih、yeh、xieh，八仙过海各显神通亇模仿北方话。沪剧名家有一位“解洪元”先生，圈内称其为“贾洪元”，并有“贾派”。其实“蟹姓”文读音并勿统一。
类似亇冲击生僻字应该采纳文读音亇固定思维亇例子还有交关，篇幅有限勿一一列举。故咾啦，综上所述，除脱已经有市场亇文读音，碰着生僻字我伲是没理由定规要推荐一个仿北文读音亇，而是优先推荐自源层亇规则读音，就是白读音。
既然讲到了姓氏亇读法，我伲就顺带便讨论讨论流行亇“姓氏用白读，名字用文读”亇说法。箇个确实有眼道理，毕竟一般性来讲白读音层次比较老，姓氏是世代相传亇，祖孙几代姓氏读法也勿一样也是蛮尴尬亇，但是勿是没，下头讨论亇吴姓就是个例子。而文读音相对比较新，地位比较高，名字也会得倾向文读音，但是迭个规律也勿是金科铁律。姓氏文读亇现象是有亇，主要情况以下三类，第一种情况：白读是训读勿是本音，譬如讲：“戴帽子”亇“戴”字，白读是训读“带” ，读姓氏亇辰光还是要用本音，就是所谓文读音“戴teh”。第二种情况，白读音搭本字老早脱钩了。譬如讲“人可何”有个滞古音白读“嚡ra”，一般写作口字旁鞋子亇“鞋”，大家也意识勿到“嚡”字是“何”字亇白读音。第三种情况，白读音边缘化了，其实搭上述情况有眼相似，勿一样亇地方是：箇一类白读音是规则层读音。例子有：“吴”“王”等姓。口天吴本生是白读ng，现在“吴”姓也已经文读化了，“吴”字亇白读音也只有吴江、吴县等地名也用。三划王是三等字，白读音本来是“旺yan(yaon)”，接近阳光亇“阳”。现在“王”姓读文读。 “王”字白读音垃该地名里向还保留几处。譬如讲，《浦东新区地方志》记录：“龙阳路”是因为“龙王庙”而得名。
就名字来讲，蒋介石、张学良、宋江等等全是习惯白读亇。 “学”字亇低仿版文读音yaq(yaoq)已经没办法隑普通话亇牌头了，势力勿强大。而“江”字亇白读音目前也比较稳定，相反文读音只有文读迷使用。故咾平常名字里向迭几个字，大家还是比较习惯白读音亇。相反“介”字亇文读音还是比较常用亇，譬如讲“介绍”。除脱习惯问题，蒋介石亇名字为啥要用白读，倒是也讲勿出啥个特别理由。
还有两个人名呢，也是可以拿来讲讲亇。一个呢是：滑稽大师姚慕双先生亇师傅，何双呆大师。箇个“呆nge”呢，就是“呆徒”亇“呆”，文读音是“懛te”。但是圈内没啥人用文读亇，全是用白读。另外一位呢，是阿拉吴越地区亇数学家：华罗庚。我周围亇圈子呢，大家全是习惯白读亇。我勿否认文读音是存在亇，文读音也没啥勿可以。但是我可以保证讲，箇个名字习惯白读亇人还是蛮多亇。
市面塱向洋派亇人蛮多亇，我也碰着过几个朋友，伊拉爷娘起名字亇辰光，汉语名字是对应一个外文名字。譬如讲：嘉琳对应Carin、卢佳对应Lucas。此地用文读音，像煞也勿合适。网友中也讨论过李嘉诚亇名字是应该文读还是白读，“嘉”字文读音虽然对应北方言话，但是“嘉”字亇白读音更加接近粤语，啱啱较当事人是个香港人。
故咾啦，指导文白异读亇还是习惯问题，没铁亇规定。
（全文完）