点击下方收听音频，时长11分33秒
上趟，吴语书院发布了上海闲话ABC亇“《文白异读层次类型详析》之三”，大家是否还有印象？本期接续上趟亇文章。
注：本文拼音方案是拉丁式拼音，搭书院拼音不同，阅读亇辰光请注意。
-h表示上去合声（否则-r表示去声，本文勿分上去声）。
总结：
文白异读是个层次问题。文读音是旧文教体制下，地位高亇读音。白读音是更加有自身方言特色亇读音。顶大亇一组文白异读是：模仿北方言话亇读音为文读；自源层读音为白读。
白读音亇地位低下，有常也表现在书写形式塱向，有一种“伊也配姓赵”亇感觉。交关白读音是有另外书写形式，比如：何对应嚡、喂对应饫、呵对应哈。有常也是分工需要，比如：“个人”、“箇个”、“好亇”。有常是起初书写者没意识到迭些白读音搭本字有关系，也是赵家门亇人，久而久之也习惯了。
有人认为“读书必须用文读音”；迭牌想法呢，讲穿之就是普通话还没普及亇时代亇“读书必须用普通话”亇思想。反映亇也是白读音亇地位低下，拨认为是勿登大雅之堂亇啊。
基于对文读、白读现象亇充分认识，本人对白读、文读采用亇态度是：我勿主张彻底清除仿北文读音，迭个也是做勿到亇；而是希望是向白读音倾斜，指自源层规则读音。
具体三条原则：
- 生活中习惯用白读亇就用白读。
- 生活中习惯用文读的就用文读。
- 生活中用白读文读全可以亇，倡议用白读。
体现倡导白读，搭之尊重语言现实亇两个核心。
文读使用问题：
关于文读亇使用问题，或者滥用文读亇问题，我搭大家探讨探讨。
白读、文读是一种竞争关系。 （徐通锵先生在《历史语言学》中指出：“文读形式产生之后在语言系统中就出现了文与白的竞争。）比如讲，常用字“大小”亇“大”字亇白读文读全是比较活跃亇，有一种分工亇趋势。注意，我讲亇是趋势。白读“大”，通常用于具体化亇大。文读“大”，通常用于抽象化亇大。是事实塱向两者亇界限是比较模糊亇。譬如讲：大半夜、大年夜、大前日、大后日，全是白读（《上海方言字典》P42-43）。“大书”、“大戏”也是白读。（《简明吴方言词典》P11-12）。此地亇“大”并非是具体亇大。“大亨”文读，“大好佬”白读。“大蒜”、“大饼”、“大麦”是文读。“大闸蟹”、“大米”、“大馄饨”是白读。“大dah白菜”也叫“大duh白菜”、“大dah肠”也叫“大duh肠”有文白两读（《上海方言字典》P44）。“大拇指”是文读，同义词“大节头”、“大手节头”就是白读。（《上海方言字典》P44）“大排”习惯文读，同义词“大排骨”是白读。“大dah哥”习惯文读，而“大duh阿哥”是白读（《上海方言字典》P62）。“大duh姐ciah”白读、文读意思勿一样。白读大姐，指：排行考前亇姐妹，旧时也表示未嫁女子、受雇佣亇年轻女子。文读大姐，是上世纪五六十年代称呼中年妇女亇啦。（《上海话大词典》P172）。生活当中指导文白异读亇主要还是习惯，分工是次要亇。
个人认为，毫无必要追求箇个文读音。有人以为读书定规是要用文读音。迭种观点其实错误亇。比方讲：“樱an桃小口”读成“阴in道小口”，未必文雅。又比方讲：“杏ran花村”读成“淫yin歪（竵）村”，箇算啥亇场化呢，也勿成体统。事实塱向，也没迭种读法。全文读读书是从来没过亇。只是没母语意识亇旧知识分子倾向使用模仿北方言话亇所谓文读音而已；讲穿之，相当当代人以为读书必须要用普通言话。
客家语学者杨政男指出过：没有读音语音的问题，只有合不合平仄与押韵的问题，而且白读比文读合韵得多，所以读音之说，是「多事之庸举」。意思就是：文读音是“多事之庸举”。
李益所写亇《江南曲》：嫁得瞿塘贾，朝朝误妾期，早知潮有信，嫁与弄潮儿。
其中“儿”字，要是采用白读gnih就搭“期”押韵，相反要是采用文读音rehl箇就勿押韵了。
垃拉当年整理通用汉字上海言话参考读音亇辰光，我就碰着过采用仿北音文读，还是自源层白读亇问题。原来有一种思维定式，当然也是为之长期整个社会母语意识低下造成亇，就是：生僻字读音应该倾向文读。但是实践经验否定了迭种错误亇思维定式。
首先我碰着亇问题是“奭”姓亇读音。 “奭”姓是一个市场塱向流通度相对小亇姓氏，生僻字。 “奭”字是梗摄字，自源层白读音应该是saq（saoq/sɑʔ/），仿北文读音是seq/səʔ/。姓氏通常是白读音，除非白读音呢，彻底拨文读音排斥出局了。
又有，我伲依据嚡里条原则来判定生僻字呢。蛮多上海言话亇常用字，垃拉普通话里向是生僻字，比如讲：“土”跟耷，耳朵耷拉下来亇“耷”亇合体字，就是上海言话里向“箇墶”“埃墶”亇“墶”，是上海言话里向常用字。迭个字普通话里向属于生僻字，故咾普通字库里向暂时是缺少迭个字符亇，造成使用困难。我平常只好使用普通字库里向有亇后造字提土旁发达亇达（“墶”）替代，就是提土旁加发达亇达。 “庎厨”亇“庎”，“䶕牙”亇“䶕（齿巴）”，垃拉普通话里向也属于生僻字，而我伲生活当中使用亇字就是白读音对伐，kah厨、bau牙；要是有文读音就是ciah厨、ba牙，市面塱向勿是迭恁讲亇；要是定一个文读音，我伲又啥场化用得上呢。像有种词汇啊，像：入gniq舍女婿、关亡man(maon)，箇种词汇全已经是老边缘化了。像阿拉本生也勿接触，要勿是去调查一下方言，也根本勿会去晓得箇种用法，对伐。箇两个词汇全是白读音。对于迭一类字，我伲当然尽可能亇收集生活当中实际使用亇读音，但是还是难免挂一漏万亇。
生活当中，“学习”亇“学”字，文读音是yaq（yaoq），白读音是roq。 “学”迭个字亇文读韵母是搭扬州一带亇方言碰得拢亇。老文读亇参照物，勿定规是北京言话，有常也可以是江淮方言或者历史塱向亇南方官话。现在生活当中，除脱“数学、化学、科学”几个常用词汇固定习惯文读亇，其余基本全可以白读，包括大学课程“计算机学”、“经济学”等等。当然咾，要是文读迷全是可以调成箇个文读亇。 “学”字文读呢，还可以补充一个：四书之一【大dah学yaq】，搭之高等学府“大dah学roq”读法勿一样。迭个现象是因为，“数学”、“化学”、“科学”是文读迷时代已经固定下来亇习惯；而新兴词汇，群众并没拨文读迷思维定式框杀；也充分说明，书面词汇应该采用文读只是一种习惯，外加未必合理亇习惯，就是陋习啦。根据钱乃荣教授亇《上海语音发展史》第72页记录：“文学”、“男生”，有文白两种读法，现在亇趋势呢是倾向于白读音。根据1948年蒲君南编写亇《法华新字典》记录，医生（médecin） 、大学生（étudiant词条），全是文读isen、dahyaqsen。现在市面塱向已经是没迭种读法了。就是讲文读习惯也是可以变迁亇。
关于“华夏”一词读音，也是可以拿出来讲讲亇。有人欢喜读成rauxiah/ɦʊçjɑ:/，硬劲使用“夏”亇文读音。其中亇弊端是：首先“中华”亇“华”也有过一个文读音wa，已经淘汰勿用了。关于“华”字亇文读音wa，阿拉可以参考箇个译音词啊“华夫饼干”亇“华夫waffle”、“华格涅路 ”亇“华格涅Wagner ”，对伐。其次“夏天”亇“夏”亇文读音应该是啥，是有争议亇。有一部分人是勿承认高仿新派文读音xiah亇，历史塱向也确实有过低仿老派文读音“yah/ɦjɑ:/（上声）”，甚至“yauh/ɦjʊ:/”。迭只高仿文读音出现亇年代也勿长远，就是讲“华xiah”迭种讲法也是新出来亇。既然“中华”亇“华”字可以抛弃所谓亇文读音，为啥体“夏天”亇“夏”字非要用文读音呢。假使“华夏raurauh/ɦʊ ɦʊ:/”迭个词汇也采用“夏”字正常读音亇闲话，“夏”字就勿是多音字了。
上头提到“华”字有个老文读拨淘汰脱，类似情况还有交关。王福堂亇《汉语方言语音的历史演变层次》第37页中提及，（1876年摩里逊亇《宁波方言字语汇解》、1901摩伦多夫亇《宁波方言的音节》里向记录亇文读，）宁波言话蟹摄一二等字搭假摄开口三等字，有过文读音读ie、ue韵母，现在也拨淘汰。王福堂先生并且指出，箇眼文读音是外省教师带来亇现代官话读音，伴随着大清皇朝亇崩溃，科举制度亇废止，箇眼文读音也就淡出了。
（未完待续）