点击下方收听音频，时长9分21秒
上趟，吴语书院发布了上海闲话ABC亇“《文白异读层次类型详析》之二”，大家是否还有印象？本期接续上趟亇文章。
注：本文拼音方案是拉丁式拼音，搭书院拼音不同，阅读亇辰光请注意。
-h表示上去合声（否则-r表示去声，本文勿分上去声）。
第七类：
训读对立亇本方言规则读音，大多数情况是当作白读，但并非总是白读。训读就是照牢一个汉字读另外一个语素。
训读为白读亇例子有：
“戴”字，就“戴姓”搭之“戴帽子”亇“戴”，有teh、tah两读。白读音tah本字是“带鱼”亇“带”是一个训读，此地算白读。
训读为文读亇例子有：
“姐姐”亇“姐”文读音是cih（tzihj），实际是训读“姊（姊）”字。 “姊（姊）”：【广韵】将几切。 “姐”字自身读音是tziah，【唐韵】兹也切【集韵】子野切。 “姊”应该是比较书面亇词汇伐。
文白两读来自两个勿同亇训读亇例子有：
“呆（呆懛）”亇读音有两亇，白读nge，比如“呆徒（俗作呆大，遇摄读果摄是种滞古音现象）”，文读te，比如“呆小症” 。白读是训读“呆”字，写下来是岂有此理亇“岂”加一个“犬”字旁：【广韵】五来切。文读是训读“懛”，树心旁加臺：【广韵】丁来切。为啥体同样是训读，一个是白读，一个是文读，也是因为北方言话地位高，有北方言话作靠山亇读音地位高。 te符合普通话“呆”字亇读音。
同一个训读派生出文白两读亇例子有：
根据《吴语概说》152页亇搭155页亇记录，“抓”字文读tza、白读tzau。其实箇两个读音全是训读，原为“揸（摣）”字，提手旁检查亇查啦：【集韵】庄加切，假开二平麻庄。而“抓”字本音是tzo，【广韵】侧交切，效开二平肴庄。埃个读音《上海市区方言志》第85页当作第三个读音记录。文读tza是顶符合北方言话亇读音。 “搔”字，就是“跳蚤”亇“蚤”加个挑手旁，训读音tzo，本是箇个“抓”啦。箇个提手旁加跳蚤亇“蚤”（“搔”）本音：so，搔首弄姿亇“搔”；【广韵】是：苏遭切，效开一平豪心。 （《上海市区方言志》《吴语概说》《简明吴方言词典》全有“搔”字亇训读音亇记录，但没记录本音。）
训读是唯一读音，也无所谓文读、白读亇例子有：
“闸”本生读aq开闭门也，【广韵】乌甲切，音押。箇个读音基本出局了。平常是训读“牐zaq”。写下来就是“插扑”亇“插”拿挑手旁调成柴爿亇“爿”。 （“闸”字【正字通】字汇同牐。牐：【广韵】【韵会】士洽切【集韵】实洽切，音煠。【广韵】下牐闭城门。）
文白对立亇形式是多样化亇。
文白异读通常是一对两个，但并非总是两个读音。
有一个读音亇例子。比如：“记者”亇“者tzeh”也是一个低仿老文读，模仿亇对象是历史塱亇南方官话。 “者tzeh”亇白读音、自源规则读音应该是tzauh（同赭），但事实塱向已经拨文读音排挤脱了。
比如讲箇个：“懈”，文读是xiah，比如“懈怠”，声母清化，见系二等文读加细音，要是韵母也是ie就是高仿文读了。叫作上海言话ie韵母也实在勿发达，否则也难讲就是一个高仿版。 “懈”亇白读音是“gah”，比如“懈闷相”。匣头亇“匣”，匣母字读/g/是一种滞古音现象。就是箇一组文白异读是：仿北音对立滞古音，而自源层规则读音rah缺席。
还有箇个“拿”。 “拿”字读音有：na、no（nho）、nhae、nau。其中文读na是仿北音噢，外加是假滞古音，nau是自源层次亇规则读音，nhae是训读“担”字。根据开埠初传教士记录“拿nhe”慢慢替代了“担tae”。 《上海方言词典》记录亇no/nʱɔ/交nho/ˀnɔ/ 则是一种滞古音，就是“拿”字读音垃该从na/nɑ/变no/nɔ/再变nau/no/亇发展过程当中停留垃拉箇个no阶段了。而nho则是垃拉no基础塱向变化出来亇读音。
“个人”亇“个”字亇例子也是邪气经典。迭个字亇读音有一串。
第(1)个：kuh，“个”字自源层规则读音是kuh，勿规则读音根据语境勿同发展出好几个。
第(2)个：req，量词，也充当助词，相当普通话亇“的、地”。充当助词亇辰光，平常写箇个一撇一钩一竖钩啦（“亇”），箇是一个异体字，或者“个人”亇“个”亇古体字，也是现在今朝亇简化字，一撇一捺一竖（“个”），也是粤语当中一个造出来亇字啦，口字旁一个既然亇既（“嘅”）。老派口音还有读keq亇，是声母慢慢较弱化脱落了结果。
第(3)个：geq，充当指示，也是粤语亇“嗰”字，就是口字旁“个人”亇个，曾经呢是远指，当代上海话是近指，相当普通话亇“这”。根据传教士亇记录呢，繁写时代上海通常是写作竹字头“固定”亇“固”（“箇”）。简体字时代，为之竹字头“固定”亇“固”（“箇”）常庄会得拨系统转化为箇个简化字，一撇一捺一竖啦（“个”），故咾学界改用箇个“搿”注音。就是两个手当中一个合。老派还有保留读“kuh”亇。
第(4)个：keq，韩邦庆亇『海上花列传』中记录亇“故末”亇“故”，也是故事亇“故”，实际还是箇个“个人”亇“个”字。 『孽海花』十八回中记录为“个末”，写亇就是箇个“个人”亇“个”。 “缘故”亇“故”呢通“个人”亇“个”呢，是由来已久亇。此地“故”呢，是充当指示用亇，当年读音也同“个kuh”，至今金山等地该词汇第一个音节还是读kuh舒声，而上海市区读音已经变为keq了。 《上海方言词典》记录为注音字“葛末”，草字头一个姓葛亇“葛”啦。
以上三个读音亇韵母全是弱化为入声eq亇。
第(5)个：keuh，《上海方言词典》（370页）记录有“一杆子”。迭个“杆keuh”是注音字，本字实际塱就是“个人”亇“个”字。就是“个”字鼻化为keun，再鼻韵尾脱落为keuh。
第(6)个：kah：“个”亇读音还要加上一个滞古音：kah，记录为“中介”亇“介”。 “煞有介事”、“介许多”亇“介”是指示词，实际就是“个（箇／嗰）”亇滞古音。就是“煞有此事”、“这许多”亇意思。
（未完待续）