点击下方收听音频，时长8分22秒
注：本文拼音方案是拉丁式拼音，搭书院拼音不同，阅读亇辰光请注意。
-h表示上去合声（否则-r表示去声，本文勿分上去声）。
上海言话文白异读是日常常庄碰得着亇问题。此地我搭大家分享一眼个人亇心得。
同一个汉字会得有来源于勿同层次亇几个读音。文白异读实际塱向是一个层次问题。勿同层次亇读音当中，在旧亇文教体系下地位高亇是文读，相反则是白读。历代模仿北方言话亇读音是主要亇一类文读音。故咾，通常讲亇文白异读就是指：模仿北方言话产生亇文读音搭之自源层亇白读音之间亇对立。但是，文白异读并非只有迭一个类型。
常见读音层次有以下几类：
第一类：
模仿北方言话亇是：文读，而与之对立亇本方言亇规则读音是：白读。箇个是顶大亇一类文白对立，占文白异读亇大部分。
箇一类文读音是历代模仿普通言话及其前身--官话亇结果，也可以是江淮方言等近北方系方言。其中又分高仿、低仿，可以有几个层次。低仿通常是老文读，部分已经拨淘汰了。比如：“下”字亇高仿新文读是xiah。当代上海市区已经淘汰了“下”字亇老文读，但是周围吴语方言点还存在几个低仿老文读是yah（《杭州方言词典》）、yauh（《苏州方言志》）等。
由于低仿老文读搭之普通言话勿大像，故咾有人勿晓得文读音搭之北方言话也是搭界亇，甚至闹出“方言保护人士”要誓死保卫“文读音”亇笑话。实际塱向低仿老文读还是学北方言话亇。比如：见系二等字，垃拉自源层规则读音基础塱向加细音介音为文读音，迭一条规则也是模仿北方言话特征而定亇。老早没广播电视亇年代，又没大批移民，接触北方言话亇机会是相对少，学得勿大像是可以理解亇。
勿相信文读是仿北音亇人，有人认为文读亇参照物是【平水韵】，也有人认为文读参照物是【广韵】。我伲可以来核实一记亇。
假kah，真假亇假，文读是ciah。冶yah，冶金，文读是yih。且chiah，文读音是chihj，而且。所注亇读音，前头是白读音，白读音主元音同为a；后头亇是文读音，文读韵母是勿同亇。迭垯三个字同为【平水韵】上声二十一马韵，也同为【广韵】假摄开口上声马韵。显然，箇个文读参照物并非是【平水韵】，也勿是【广韵】。
文读确实会得有好几个层次，有常是引进年代勿同而造成亇。比如：解放亇解ciah[tçja:]、携带亇携yij[ɦjij]（-j是后带摩擦音）、冶金亇冶yih[ɦji:]、机械亇械yeh[ɦje:]。迭垯四个字普通话亇韵母同样是ie；除脱“冶金”亇“冶”是假摄字，其余三个是蟹摄字。同样是仿北音，为啥会得模仿得勿一样呢。
- 解放亇“解ciah”亇文读音是按照白读见系二等加细音介音亇原则推导出来亇。
- 而携带亇“携（㨙）yij”亇文读音yij则是引进亇辰光是读ye亇，当时盐水亇“盐”跟贤良亇“贤”等字还有鼻韵尾巴。之后呢，“盐”跟“贤”鼻韵尾脱落变ye；而携带亇“携（㨙）”呐，读音就拨推进为yi/ɦji/混同夷狄亇“夷”，之后随夷狄亇“夷”演变为yij。
- 冶金亇“冶”亇文读音yi是稍为晏一眼亇辰光引进亇，当时也是读ye搭之同时代亇盐水亇“盐”、贤良亇“贤”等字亇读音是混同亇，之后就随盐水亇“盐”跟贤良亇“贤”演变为yi。
- 机械亇“械ye”亇文读音ye引进亇辰光就更加晏了，就是现在亇读音ye。迭个辰光，冶金亇“冶”搭之盐水亇“盐”、贤良亇“贤”一类字亇韵母继续发展，变成了yi，而携带亇“携（㨙）”读音随同夷狄亇“夷”拨推进为yij。到了当代，越来越多亇人也勿分yij/ɦjij/跟yi/ɦji/了。
又比如：“癌症”亇“癌”字，本生是“岩石”亇“岩”亇派生字，属于二等字。香港亇“港”字也是二等字，搭讲言话亇“讲”同音。普通话吸收了南方读音，北方方言当中还有“癌症”读“炎症”亇，地名中有“港”有读若“ciahn”亇。既然权威方言--普通言话也采用了南方读法，像煞也没人觉着有啥必要再搞一个文读音了。
低仿老文读亇尴尬事体也是蛮多亇。
比如讲：王福堂垃该《汉语方言语音的历史演变层次》里向提起：吴地知识分子误以为北京话“挪”读na，故咾推导出挪用亇“挪”字文读na。（注：《汉语方言语音的历史演变层次》并指出：当然“娑”“挪”的读书音都是误读。但正因为是误读，就更能说明异方言借入的不是词语而是音类，因为只有音类才是可以类推的，而只有类推才有可能出错。）
又有：《上海市区方言志》记录：酦酵粉亇“酵”文读是xioh，而现在普通话迭个字读jiao，像煞没关系。实际塱向：五六十年代亇普通话亇“酵”是读xiao亇。（注：可以翻阅《学生小字典·乙种》商务印刷馆·第五次修定。）是普通话多次审音后，恢复了普通话“酵”亇见母读音。个人认为，像迭牌老文读没忒大亇保留意义。
由于旧知识分子母语意识低下，北方话地位长期高于吴语；各路高仿版、低仿版北方读音狐假虎威骑垃拉吴语自源层读音头塱向成为登堂入室亇文读音；而吴语自源层亇读音则沦落为白读音。
第二类：
本方言规则读音，是主流读音，是在中古汉语基础塱向按自身规律发展而来亇自源层读音。在旧亇文教体系下，箇个一类读音亇地位是低于模仿北京官话或者江淮方言亇读音亇地位，相对于模仿北方官话亇读音是白读音；但是又是高于以下几类读音亇地位亇，相对于以下讨论亇几层读音又是文读音。
（未完待续）