点击下方收听音频，时长9分14秒。
搭倷一道来传承母语，大家好，我是天堂吴韵，今朝我来帮大家探讨一记，补课叫停之后，小囡奈何利用好业余辰光。
7月24号，国务院发布仔进一步减轻义务教育阶段学生负担亇决定，小囡业余辰光充裕哉。爷娘总归希望小囡将来出人头地，所以小囡亇业余辰光，也要充分利用好，毕竟童年辰光是最宝贵亇。现在小囡也蛮配合爷娘，也晓得多一门技能，多一条出路。所以，周边业余兴趣活动班也开始热络起来哉。钢琴班、游泳班、围棋班甚至中医班也得到仔不少年轻家长青睐。
年轻家长亇想法是对亇，一门才艺可以帮助小囡发展得更加全面。但是小囡毕竟精力有限，兴趣班也是会加大小囡压力，有交关家长大铜钿厾进去不少，效果不尽人意，不欢喜兴趣班亇大有人在。其实，箇种行为就中仔办兴趣班亇商家亇圈套哉，有交关技能是比培养箇所谓兴趣更加重要亇。
笔者在加拿大生活两年，因为工作亇缘故调查仔关于当地科学、教育方面亇信息，可以来帮大家讨论一记小囡应该奈何利用业余辰光。
加拿大社会搭国内有个蛮大亇区别，就是社会力量强大，各式各样亇社会组织多如繁星。所以从小参加社会组织是人生过程当中相当重要亇一部分。举个例子，可以参与公益。加拿大几乎每个社区侪有公益组织，从小让小囡参与公益活动，一方面可以激发俚亇爱心，另一方面可以从小得到社会亇认同，成为社会亇一部分。国内，其实每个居委会、街道也是有不少公益活动亇，小囡有空完全可以去参加，成为本小区、本街道亇一份子。
除脱公益组织以外，还有一个顶顶重要亇，就是以语言为标志亇民族性组织。学好母语，是民族性组织亇入场券。参与民族性亇组织在西方社会生活当中是必不可少亇。碰着困难，同胞是可以帮忙亇。一般民族性亇组织会长，侪是愿意帮助落难亇同胞亇，因为可以在当地发发声音，提升自家亇社会地位。国内其实也是有不少同乡会，里向也是可以互相帮助亇。对于我伲吴越人来讲，吴语未来亇传承，最有可能亇是通过本地人社区传承。本地人弄一些互助组织，周末大家一道来讲讲方言，有啥事体帮帮忙，是最有可能做成亇。
语言有啥亇用？总不见得仅仅是交流工具？箇种理论就是骗倷放弃母语亇谬论。语言最关键作用有两点，一是以共同文化圈为基础亇人群资源。会讲一种语言，就能收获一圈人脉。我伲可以看到，有不少企业，有种人会讲两句领导亇方言，职位就火箭式上升，因为人侪是讲裙带关系亇。箇个不算不公平，而是不同文化圈人群当中亇竞争。哪种文化圈亇人最终胜出，俚属亇文化就好推广到全社会。两是通过日常语言形成亇哲学观、价值观。江南人平常讲言话，不知不觉就用到江南人亇俗语。譬如“各人头上侪有一爿天”，说明江南人比较尊重个人空间。其他方言，如四川有句俗语，“黑猫白猫捉到老虫就是好猫”，就反映出四川人独特亇价值观。俗语是一套体系，是会经常使用亇，所以思考方式也会潜移默化形成。普通言话语境中，就无没上头讲亇俗语，形成亇思维方式也是不一样亇。
在西方，依族群为基础亇私立学堂也是相当多亇，小囡从小学习自家作为自身族群亇一部分，奈何在西方生存。母语搭当地语言也是必不可少亇。当地主流社会族群英格兰后裔，也是有私立学堂亇。俚属主要招收英国姓搭北欧姓亇白人，教授亇内容，就不晓得是啥，但是肯定搭俚属族群奈何掌控加拿大社会各个领域有关。箇种学堂收费相当贵，但是出来基本上就是各个领域亇佼佼者。想想就晓得，不可能毕业亇所有学生子侪是有能力亇，裙带关系互相往社会上层拉是最有可能亇。
除脱组织、方言以外，顶重要亇是家庭教育哉。国外爷娘不光是从小培养小囡做家务，学习最基本亇生存能力；最关键亇是家庭历史、家庭信仰、家庭习俗等，箇是西方家庭教育最重要亇环节。
因为公立学堂亇教育，是维护社会多数人亇利益，所以教授学生社会主流价值观；而家庭教育是维护自身家庭利益，目的不一样亇。家庭教育可以补充学堂教育当中不方便教育亇内容。举个例子，西方公立教育当中肯定不好涉及种族问题亇。奈何帮某些种族亇人相处，基本上是家庭教育范围。公立教育也不会多讲社会负面亇物事，如暴力、诈骗，假使全部拿教育推拨公立学堂，小囡不能掌握奈何防人，安全受到威胁，爷娘是不负责任亇。
家庭历史是家庭教育主要内容，讲讲自家祖先亇苦难、经验、教训，箇是最接近事实真相亇历史故事。家庭、家族历史不晓得，小囡是不可能了解到对自身最有用亇社会信息，倷搭祖先吃过亇苦头就白吃哉，无没人晓得。西方不少家长侪是专门为小囡写一本书，介绍自身家族亇历史。中国人老早也有家谱，也是记录家族亇历史，可惜往往记录不够全面、系统，不少宝贵经验无没让自家子孙掌握好。
言话讲转来，方言其实也是家庭教育亇一个重要环节，选择家庭主流方言，让小囡从小认同自家亇族群，也是相当重要。认同族群，就是认同一种文化体系。包括族群亇历史、信仰、习俗等等，除脱依族群为基础亇学堂之外，也应该是家庭教育亇范畴。
所以，钢琴也好，游泳也好，围棋也好，只毕过是一种技能而已。社会当中有几许用场？人是社会关系亇总和，小囡从小要参与到社会当中去，再是顶重要亇。家族、族群、社团，是小囡必须参与亇三种社会关系，箇种社会关系终身受益。母语是家庭、族群亇标志，也是一个人际圈共同亇历史、信仰、习俗。小囡会八门外语，也比不上自家亇母语，因为在社会上，外语只毕过是技能而已，难融入人家圈子亇；会母语，就会有自家同乡圈，就会得到更多人亇大力帮助。
所以，中国小囡教育当中，有不少忽视亇方面。年轻家长除脱盯牢大家奈何做，削尖脑子轧进去，也可以细细想想是否有更加重要亇地方，是需要让小囡学习亇。