点击下方收听音频，时长7分09秒。
3月7号，一只新闻在上海各大媒体上报道。新闻亇视频里讲，杨浦区开了一只“肯德基食物银行”，一开门，就有多名老年市民轧在冰箱前头，在冰箱门拉开后亇短短几秒钟内，里向亇食物拨一拿而空。之后14号又报道，上海公交49路陆续推出多项“爱心乘”，为老年市民提供免费乘车服务，但是又拨发现有不少人在揩油硬币。箇两只新闻报道下来，网友圈子里向大量谴责上海市民贪小便宜，不符合现代市民形象。某些抖音主播，甚至带节奏，趁机拿是亇事体搭哄抢翻车事件联系起来，要求有关部门进行处理。
杨浦一肯德基店免费食物拨争取
上海49路公交提供免费硬币
现在网络社会就有箇能亇滑稽现象，一点点小事体，只要带着热点，就会上纲上线。有关部门么，不少也会拨舆论带偏脱，甚至于想搭舆论妥协，按照大家亇意思来处理。有辰光，静下心来想想，就会发现不是箇桩事体。
首先，我伲承认，争取免费食物，确实吃相难看，但是争取免费食物搭哄抢翻车会是一样亇吗？“哄抢”是啥亇概念？可以讲是一种偷窃甚至是抢劫行为，翻车货物侪是私人所有亇，并且主人无没讲过会拨大家。“肯德基食物银行”写好是免费拨市民亇，上头写好限制对象否？无没。箇么，老年人拿物事就是合法亇。从法律角度就可以分清爽，搨便宜搭犯法，是两种性质。
其次，争取免费食物也不仅仅是上海市民，不少外地口音亇老年人也在。但是不少评论，甚至是媒体评论就选择性忽视，单批评上海市民，箇就忒不公平了。侬批评其他地方老人可以，但是批评上海老人“坏人变老”就罪过了。侬晓得“上海支援全国”吗？计划经济时代，上海作为少数供应全国亇城市，赚1块钿要拿出8角7分支援其他地方，自家留13点（1角3分），物质紧张形成了后遗症。蛮多地方，工业产出少，但是日脚比上海好过，铜钿啥地方来亇？侪是从上海过来亇。现在上海老人，侪经历过物资短缺亇年代，生怕吃不饱，而囤食物。上海老人一辈是中国亇骄傲，搭某些“坏人变老”根本就不是一桩事体。
第三，通过争取免费食物，来断定“爱心乘”硬币是欢喜贪小便宜亇上海市民揩油，更加是大错特错。侬作为媒体有充分证据证明是揩油了？落脱可以否？拿错脱可以否？外加，最近25号报道，箇“爱心乘”推免费乘车12天以来，目前已经“收支平衡”。通过少量捐款，硬币基本不少，说明拿错或者落脱亇情况更加多。假使上海市民素质低，侪来拿硬币，箇么硬币缺口是不可能补得好亇。
老明显，箇类新闻亇小编、视频亇主播有带节奏、妖魔化上海人之嫌疑。搨便宜各个地方侪有亇，上海以外亇地方，只会得还要激滚。看见新闻，不分析判断，不辨明真相，看见“上海”两个字就直接攻击，目的是啥？其实，箇类新闻亇背后是我伲亇悲哀。现在上海市民亇话语权一点一点在丧失，箇种丧失还要从我伲自家身上寻原因。假使，有人帮侬讲，上海排外，侬就不讲上海方言了；或者有人帮侬讲，上海人素质低，侬就处处小心做人，箇么，侬就助长了某些人诋毁上海亇气焰，拨所谓“上海排外”“上海人素质低”之类亇错误观念有机可趁。
作为上海市民，我认为三点肯定要做：一是自信。相信阿拉亇素质、道德肯定是全国一流亇。有人指责上海人哪能哪能，人再多，侬也要动动脑筋，伊拉讲得对否？有辰光是骗侬亇。有种人最好上海人侪放弃方言，侪活得像灰孙子，侬也好去凑上去亇？两要为自家发声。有种贬低、攻击上海亇事体，一定要及时发声。有不少人是中立或者不明真相，假使无没我伲亇声音，伊拉只会相信多数人亇说法。沉默有辰光不会爆发，只会是说明侬默认大家亇批评，事体就可以无中生有了。像箇种攻击上海人欢喜揩油亇事体，就要坚决发出反对声音。三要保护好自家。世界上国与国之间有竞争，国内地方搭地方，人群搭人群也是有竞争亇。所谓怀璧其罪，不少人就看想上海人亇资源、房产、家当，最好分一分。外加上海作为吴越亇一部分，本上就属于少数民系，就要求我伲更加要注重保护自家亇利益。社会竞争激烈，生存不易，从来无没岁月静好，要想生存下去就要会得保护自家。哪能保护，首先就要讲好上海言话，箇是我伲团结亇基础。