点击下方收听音频，时长6分30秒。
搭倷一道来传承母语，各位吴语书院亇听众朋友大家好，我是天堂吴韵，到仔评论版块搭大家见面亇辰光哉。今朝由我带大家一道来探讨最近苏州热议亇园区地名修改。
最近，《“娄葑、斜塘、唯亭、胜浦行政区划更变方案（草案）”亇公示》在苏州市民当中流传开来。公示中称，要将斜塘街道更名为独墅湖街道、胜浦街道更名为东沙湖街道。公示一公布，就引起仔网友亇热议。蛮多市民觉着，该种更名是不尊重苏州历史亇。斜塘、胜浦有啥历史？让我细细道来。
苏州工业园区原定街道命名方案
斜塘是有近千年历史亇，最早出现亇文献，是在南宋淳祐九年（1249年）苏州刺史郑霖撰写亇《重修崑山塘记略》中。“从新洋江出吴淞江、斜塘以至葑门”，描述淳熙七年（1179年）疏浚娄江，治理沙湖亇过程。“斜塘”得名是因为苏州东面有一条水路，往北，出娄门，沿塘河至吴淞江入海，呈“之”字形状态，有点斜。江水斜流，塘岸自然也斜，故而称“斜塘”。明清时，集市向斜塘河以北转移，形成集镇。清初，因为商业繁荣，人口增多，斜塘集镇大体以中塘江为界一分为两，俗称南斜塘搭北斜塘。北斜塘在清咸丰年间毁于战火，南斜塘因金鸡湖堤坝建成，经济渐盛，形成仔一条商铺林立亇热闹街市，即现在斜塘老街。民国初年，吴县政府在南斜塘设斜塘乡治所。1930年，斜塘商家集资建成“慰民桥”，方便斜塘河南岸百姓来老街购物，让老街相当繁荣，一直保存到工业园区建立之前。
胜浦形成与1949年，搭新中国同龄。当时在唯亭乡搭甪直乡之间，有个不曾命名亇集市，已经发展为乡镇集市亇规模。就依该个集市为中心，让唯亭乡搭甪直乡各划出一块地方，建立新亇乡。因为当时是苏州解放胜利当口，取字“胜”；集市又在河岸边，取字“浦”，命名为胜浦乡。
长期以来，斜塘菱藕、胜浦三宝在老苏州人中是家喻户晓。因为该些地方原来是水乡，因为土质不同而所产不同。
虽然讲，时代要发展，但是发展搭苏州传统文化并不矛盾。苏州一直是在中国经济发展亇前沿，照理来讲苏州亇文化也应该是与经济发展相适应。至少我作为小小的苏州市民也是箇状认为亇。
但是一些来苏州无没几许年亇胡头，却搭我伲绝大多数土生土长亇苏州原住民想法不一样，某些网友，乃至在工业园区某些机构亇公职人员，将我伲亇想法斥为思想陈腐、抱残守缺。伊属认为苏州传统地名是落后亇，所以需要用某些高大上亇地名来取代。但不过，我并不觉着有几许高大上，相反非常土俗：
独墅湖，在苏州虽然有历史，但是搭斜塘相比还是逊色多了。独墅湖以前是个荒地，“独墅”亇名字可见一斑。另外既然有仔独墅湖亇湖名，街道也要改掉，阿是画蛇添足？
东沙湖，不见经传亇湖名，不晓得阿是新弄出来亇，何德何能取代“胜浦”该状亇地名？而且沙湖该种地名，在全国已经滥哉。
伲可以看看某些论调，非常明显，某些自称新苏州人亇网友是用一种居高临下亇方式“点拨”苏州本地网友亇，根本不肯放下身段来搭苏州原住民探讨。俨然一股新移民侪是高学历，苏州原住民无没文化之类亇感觉。诚然，当中有不少人在苏州有一片事业，是有一定能力亇。但是，难道苏州原住民就不无没人才？不是讲，苏州亇状元、院士之乡奈何来？苏州文化搭理念，对于倷来讲，就无没可学之处？
问题出在啥个地方？因为伊属来苏州一直在自家亇圈子里，蛮少搭苏州市民接触亇。有蛮多人，来苏州多年，不晓得苏州原住民也是吃面亇，也不晓得苏帮菜亇存在，甚至不晓得有苏州言话该个概念。自家圈子里，相互吹捧，贬低苏州之风盛行，造成功对苏州文化亇一种偏见。箇种偏见一方面局限了自家亇眼光，一方面对苏州原住民权益也有蛮大伤害。
我想，倷从千军万马亇竞争中脱颖而出，从老家来到苏州，在苏州有自家亇生存空间搭职业生涯，对苏州应该是一种尊重亇心态。倷不是来扶贫亇，更加不是来帮伲摆脱“愚昧”亇。苏州能够千百年来长期在中国经济发展前沿，除脱地理位置搭国家政策，更多亇是市民经营有方，倷用不着怀疑伲做法亇正确性。假使你怀疑，可以先拿自己家乡发展好，社会发展超过苏州，然后来点拨伲苏州原住民，阿是更加让人信服？
所以，请以谦逊亇态度来对待苏州亇一草一木，包括地名文化，将心比心。苏州是一座包容亇城市，也望倷能够包容苏州亇文化，早日融入到苏州该座经济发达、历史悠久亇城市中。