点击下方收听音频，时长5分26秒。
近昶，网塱埃个关于全家顾客脱店员之间由于上海言话、引起网络激烈讨论亇视频想必大家已经或多或少有眼了解哉什，实际塱里向涉及到诸多问题大家也是有数亇：关于上海迭座城市、关于上海人迭支族群、关于上海言话迭种语言，勿管啥辰光、啥个场合、啥个语境，只要打上“上海”两字，侪好一石激起千层浪。就是迭能，勿知从几时起，“上海”就变成功实介，用乃朝言话讲、一个“奇葩”亇脚色，屹立垃许中华民族亇百花园当中。
葛咾，我就姑妄一言。事体一出来，网塱评论满天飞。乃朝亇氛围啊，是网络成为仔一个宣泄口，虽然讲，网络留言并勿能够完全反映社会面貌，为仔作兴垃日常生活中积压仔勿少压力脱情绪，正好通过网络抒发出来，但不过，由于网络亇勿真实性，平常辰光勿大敢讲亇暗戳戳心理，也垃许迭种表述中体现出来，而迭些物事是可以反映一眼现状脱想法亇。
我伲拣一个评论来看看，蛮有意思，也比较有代表性。评论内容邪气简洁，三个字：说人话。落款，嘉兴公安。看到迭亇，勿晓得诸位有啥想法，我只觉着悲哀。本生按照我亇脾气，我实骨子当然可以用江南上海底蕴丰富亇无穷词汇脱生动形象亇行情表达望望伊拉亇历代先人，来表达我亇敬意，但是于事无补，葛咾歇搁。我伲还是来分析。
头一个，啥叫啥人话？我勿是语言学专业人士，勿清爽人类语言是哪能定义亇，伊亇范围脱定义、伊亇标准脱参考是啥，我勿晓得。但不过，作为一个用尽气力垃迭颗标致星球塱生活仔靠三十年、也有幸垃迭能一个伟大时代接受过一眼粗浅教育亇人，我觉着既然世界塱有迭能一种物事、一种声音、从迭能一种看上去脱那也差勿多：两脚直立身塱无毛亇生物亇躯壳塱发出来，葛末也应该有资格好算是某某智慧生物亇言话伐？好，假使侬同意上头我所言之理，葛末请问“说人话”迭排是啥行为。我伲是否可以真亇为仔打击而忽视一切，只为杀杀两爿嘴唇相打亇念头，何况是迭种打击本身亇道理基础是否牢靠还存在交关问题亇打击。“人话”讲大勿大，讲小勿小，我勿想搭迭个评论扣啥个帽子，但不过，只要每一个假手胸膛进去有一颗鲜龙活跳物事亇人，就勿可能忍受侬迭排赛过剥夺政治权利加强版亇非人言话。
还有，迭个落款也穷有韵味——嘉兴公安。我伲回到语言文化塱向来，上海言话垃语言学分类塱，是吴语亇一种方言，脱同样属于吴语亇嘉兴言话，是同一个片里同一个小片，至于啥叫啥片、小片，大概就是为仔更加好亇定性语言之间亇特点、关系而对语言进行亇再分。勿管哪能，嘉兴脱上海，垃语言塱关系紧密。葛末风波因语言而起，我伲勿谈语言阿好。再来看看嘉兴脱上海垃其他方面亇关系。讲起来，大家侪习惯讲上海老早是小渔村，我勿来争辩事实究竟哪能，历史塱上海地区亇区划单位曾经长期属于嘉兴管辖，“老早”亇“上海人”也曾是“嘉兴人”，实介，垃历史渊源塱，两地也密不可分。除此以外，更“覅论”啥个上海到嘉兴路线勿足一百公里咾、饮食口味像咾、审美趣味近咾等等，近代我国开天辟地大事体、红船亇故事也拿两地牢牢绑垃一淘。可以讲，嘉兴上海血浓于水。既然血浓于水，葛末眼门前亇算啥？诸君自想。再有就是，作为国家职能部门亇公安，侬代表亇是啥，我想侬应该比我排草民清爽。侬当然可以从大层面塱解释，迭个脱城市无关、脱情感无关，但必过侬诋毁人民言话非人垃前头、割断人民脱生养伊亇家乡垃后头，侬亇背脊是勿是还直得起来我勿晓得。
讲再多也没用，有数亇自然有数。垃十字路口，侪当心眼好，毕竟红绿灯也难讲勿会倒。