点击下方收听音频，时长4分18秒。
近昶[1]（3月24号）网上[2]出现了一只关于上海亇[3]热点新闻视频：上海一男子在[4]超市结账辰光，营业员因为听弗懂上海言话[5]，请顾客讲普通言话，反拨训斥：“吾伲上海人不讲上海言话讲啥亇言话？.....侬吃上海亇、用上海亇、享受上海亇，就是希望上海人侪死光，然后侪讲普通话是否[6]？”最后，该男子向门店经理投诉了营业员。箇桩事体经过媒体报道之后，微博、贴吧等社区出现了一边倒亇评论，大家纷纷指责箇顾客亇行为，表示是地域歧视、优越感，甚至还上纲上线，对整个上海市民进行道德绑架。
看见箇能亇新闻搭评论，作为吴语圈亇一个团队，有义务出来为我伲江南人亇处境发声了。实质上，我伲本来就打算在4月份开启吴语书院微信公众号搭之网站亇，既然发生了箇能亇事体，吾伲也想蹭一记热点，做一眼评论，作为吾伲微信公众号亇首发。
首先，我伲认为该男子确实有眼过激，我伲弗会无条件支持伊亇行为。伊忒冲动，讲亇言话也过头了，营业员当然是靠自家双手吃饭。
其次，阿拉相信事出有因，为之视频并弗完整，各位也晓得网上交关事体，一开始大家侪义愤填膺，结果完整版本出来之，狗血剧情反转，故佬讲弗好随便下定论，阿拉就来理智客观亇分析一记事体起因：
起因1，顾客买物事，第一句言话开吴语，营业员听弗懂，但是心态正常，用理智且正常亇语气搭顾客讲：（先生我不懂上海话，请你讲普通话。）顾客继续弗依弗饶弗讲道理开吴语，冲突加大。
起因2，顾客买物事，第一句言话开吴语，营业员听弗懂，但是心态失常，用生硬弗耐烦亇语气搭顾客讲：（不懂上海话，讲普通话。）顾客光火，侬箇种态度？我在上海就是要讲上海言话，冲突加大。
各位看官，用㑚正常亇思维方式忖忖看，何里种起因容易造成顾客心态失衡发飙？其实答案一目了然，大家心知肚明。阿拉觉着，除非顾客是神经病，否则第一种情况出现亇机率实在忒小。
现在在上海的确有交关外地同胞对上海言话有种莫名其妙亇排斥感，好像上海言话弗是中国言话一样，上海人已经牺牲交关大来，有几许上海乃至江南亇小青年还能熟练掌握吴语？上海地铁开通廿几年了，市交通局大概为了照顾外地同胞，弗拨吴语报站，但是厦门地铁前两年刚刚开通，马上就有闽南语报站，甚至售票大厅撘站台也有闽南语广播提示，箇种情况对比让阿拉上海人情何以堪？阿拉上海就低人一等？
上海人看到弗懂吴语亇外地朋友马上调频道开普亇情况比比皆是，但是还是有部分外来务工者讨厌讲方言亇顾客，箇种事体绝对弗是孤例。
国家政策已经提倡保护方言，请各位来沪外地同胞善待讲吴语，讲上海言话，讲江南言话亇上海人，以免引起弗必要亇冲突，伤及民族内部感情，谢谢大家。
[1] 昶 tsian，另有写法“枪”，表示一段辰光
[2] 上 laonr，另有写法“塱”，注音写法“浪”，“上”zaonr亇音变
[3] 亇 keq，另有写法“个”，表示所属关系或形容词性，相当于普通言话中亇“的”
[4] 在 leq，另有写法“来”，注音写法“勒”，表示存留于某地点
[5] 言话 ghe ghor，另有注音写法“闲话”，表示言语
[6] 否 vaeq，另有注音写法“伐”，用在句末，表示疑问或反诘亇语气