点击下方收听音频，时长5分26秒。
近昶（3月24号）网上出现之一只关于上海亇热点新闻视频：一个小伙子在超市结账亇辰光，营业员因为听弗懂上海言话，要求顾客讲普通言话，反拨训斥。虽然箇是桩小事体，但是讲上海言话却成为一只狗牌，经过媒体报道之后，微博、贴吧等社区出现之一边倒亇评论，貌似箇上海人冒之天下之大不韪，成之过街老鼠一样。有亇甚至怒斥“上海人又在歧视外地人哉”。一下子伲上海老乡又变成之网民公敌，淹没在网民群众亇汪洋大海中。
伲发现，现在网上有箇状一种现状，在蛮多网友心里，方言似乎是原罪，总归多多少少搭歧视有关系。广东人对外地人讲广东言话，是歧视；厦门人对外地人讲闽南语，也是歧视。当然箇个“歧视”也是有例外亇：河南人对外地人讲河南言话，就弗是歧视；四川人对外地人讲四川言话，也弗是歧视；箇是为啥呢，因为河南言话、四川言话属于官话，是普通言话个亲眷，大家侪听得懂啊。以此道理，当官人家亇亲眷就要开后门，操官话人亇亲眷也要来揩揩油，反正占之一个“官”字，便有之特权。但是像伲江浙人呢，一定是呒没箇个“特权”亇：俚属本地人是讲“鸟语”亇，反正弗是自家人。
在全国各地方言衰落之际，上海也算中国少有还在争取自家母语权亇城市。争取权益，其中一个原因是因为城市物质精神文明亇提高。但是在某些网友眼中，“富”似乎是个原罪，“为富不仁”便成为富人必然有个罪状。所以江浙个语言、文化、规则，是学习不得亇，也是弗屑一顾亇，一定要让其衰落下去最好。所以“善良”地区亇语言、文化、规则便传进来，成为江浙亇主流文化之一。吴语没落哉、江浙菜系没落哉，城市规则也有改变哉，究其原因，必然是江浙文化落后，假使弗落后，又奈何会拨取代呢？虽然联合国讲要保护人类多样性，国家也讲要保护方言搭少数民族语言，但是先进取代落后便是大势所趋，啥人也改变弗了。
现在某些网络媒体，凡是来个人侪欢喜在城市名之前加一个“新”字，新苏州人、新上海人、新杭州人……“新生事物取代旧事物”么。至于阿融入当地，箇就无需考虑哉。新人之所以能够超过旧人，溯其原因，便是俚属吃苦耐劳，“吃苦”是最正确亇致富之道。所以很多乡村便贴之亇标语“苦干、实干、巧干”，苦干是第一位，巧干是最末亇。箇些“吃苦耐劳”亇“精英”虽然嫌弃了家乡，但是肯定家乡文化、规则弗会有错。于是“精英”告别家乡来江浙奉献，拿“善良”“苦干”亇文化、规则带来江浙，终于“吃尽苦中苦，方为人上人”，成为江浙亇“精英”哉。与此相反，江浙人却是懒惰、纸醉金迷个代名词，似乎必定是呒没前途亇。呒没“精英”，江浙必然衰落下去；呒没“精英”，江浙一定会崩溃；俚属简直是江浙亇拯救者啊。江浙亇院士、科学家、企业家，虽然全国最多，但是终究也是呒没用，必然要有无数“善良”“苦干”亇精英支撑。江浙人做事体亇“聪明”“科学”便是小聪明、歪脑筋，是一定要批评亇。
既然“上海人歧视之外地人”，自然拨反歧视也是应当亇。上海人么就要像犯之错个小学生一样，立壁角。下来上海各种场所，上海人就必须听讲“精英”亇普通言话；当然，到之精英亇家乡，也必须听得懂俚属亇方言；下来上海各种政策，上海人就呒没说话亇份，只能全部顺之“精英”亇要求，以此赎“歧视外地人”之罪。就像现在苏州一样，街上变得听弗见苏州言话，新开亇购物城看弗到苏州饮食，便是“精英”心中包容亇大上海了。