点击下方收听音频，时长8分45秒。
搭倷一道来传承母语，欢迎来到吴语书院。我是来自嘉兴亇理想主义者，今朝我来为大家讲一只故事，名字叫“弗力士村亇故事”。
传说在唐朝亇辰光，西域有个小村落叫弗力士村，箇个村土地肥沃，生活殷实。弗力士村民天真善良。突然有一天，英凡得国亇国民看上了弗力士村亇富饶，发现弗力士村还有些土地呒没开荒，伊拉就申请到里向居住。
（一）初来乍到
就实介开荒了几年，英凡得人发现自家随便哪能做，短时间也比弗上弗力士村民。
有种人放弃了，离开了弗力士村。 有种人认命了，觉着自家能力弗够。 还有种人弗服气，但是也寻弗着正当理由。
箇辰光有个聪明人，伊对几个顶弗服气亇人讲，我有一个办法可以让我伲超过伊拉。虽然有人反对，但是还有人照做。
（二）摇摆不定
几天后，就有人对弗力士人讲，倷垃对我伲讲弗力士语是排外，倷垃应该讲英凡得语，实介才显得倷垃善良大度。弗力士人想想看有道理，结果改成英凡得语对伊拉讲言话。虽然讲英凡得语比较别扭，但是为了消除伊拉对弗力士人亇负面影响，也就值得了。弗力士人慢慢较侪讲英凡得语，大家发现街上弗力士语越来越少了，有人开始讲闲话。
有种人觉着弗力士人蛮拎得清，懂得英凡得语是大势所趋。 有种人觉着弗力士人蛮包容，方便大家交流。 还有种人觉着弗力士人对伊拉讲弗力士语确实弗对。否则为啥要改口呢？
于是，有人开始偷偷较讲弗力士人自私。
弗力士亇社会语言就实介变成了英凡得语，大家渐渐忘记脱弗力士语。
（三）迷失自我
几个月后，又有人对弗力士人讲，倷垃饭菜比较难吃，口味忒淡，箇也是对外来村民弗尊重。弗力士人想想有道理，结果饭菜里多放了盐。虽然咸亇物事口感差，但是为了消除伊拉对弗力士人亇负面影响，也值得了。弗力士人口味越来越重，大家发现弗力士人改变口味，有人开始讲闲话。
有种人觉着弗力士人蛮拎得清，英凡得人才是弗力士亇未来。 有种人觉着弗力士人蛮老实，通过箇种方式就让弗力士人让步了。 还有种人觉着弗力士人欠伊拉亇忒多了，否则为啥要改口味呢？
于是，开始有人公然讲弗力士人排外。
弗力士亇主流餐饮口味就实介变成重口味，大家渐渐遗忘脱弗力士清淡口味。
（四）委曲求全
几年后，又有人对弗力士人讲，倷垃亇财富分配有问题，英凡得和弗力士是平等亇，应该平均分配才行。弗力士人想想有道理，结果按照人头平均分配。虽然讲个人所得少了，但是为了消除伊拉对弗力士人亇负面意见，也值了。大家发现弗力士人财富分配改了，也有人开始讲闲话。
有种人觉着弗力士人是失败者，英凡得人才是真正亇建设者。 有种人觉着弗力士人就是低人一等，我垃弗用怕伊拉，直接向伊拉提要求，伊拉肯定会得让步。 还有种人觉着弗力士人忒坏了，历史上该状多亇财富侪拨伊拉侵吞了，到今朝再改革。
于是，开始有人公然歧视弗力士人。
弗力士人亇财富少了，开始过起了穷人亇生活。
（五）穷困潦倒
几年后，弗力士人已经连温饱都无法保证了，有辰光吃了上顿呒没下顿，有辰光生病都没钱去医院医治。相反，英凡得人小日脚过得越来越滋润，家家大别墅，还做起了蔬菜家禽药材生意，搭周边亇小国家开始贸易往来，最近还筹备组商队去唐朝首都长安交流搭做生意，弗力士人再也迸不牢了，要求恢复以前亇政策，英凡得国亇国民会同意吗？肯定不会，矛盾一天天开始加剧，闲言闲语又开始传了起来。
有种人觉着弗力士人忒娇气，过不了苦日子。 还有种人觉着弗力士人忒好说话，现在该个样子活该。 有种人觉着弗力士人早晚会得反击，应该早点动手消除威胁。
于是，开始有人公然侮辱弗力士人，说伊拉是废物，连自家亇生活都成问题。
弗力士人心中亇怒火与日俱增，空气中亇火药味越来越浓。
（六）共勉共进
几年后，终于发生了大规模暴动，弗力士村局势愈发动荡，弗力士人搭英凡得国亇国民已经到了水火不容亇地步，恰恰在此时，唐朝吴语书院商队来访，无疑烈火中突降一场大暴雨，稍稍缓解了紧张局势，吴语书院商队队长听闻事体后，夜快约了双方亇主要负责人一道晚宴，在晚宴上队长向大家介绍了此行亇来意，对唐朝亇盛世繁华，军事、文化以及工业方面侪做了重点亇讲解，听得所有人如痴如醉，队长适时讲到了不同民族哪能一道生活相处亇问题，在伊妙笔连珠亇话语下双方逐渐认识到自家亇错误之处，敞开心扉搭对方交流了一番，圆满亇解决一系列问题，同时把酒言欢，该一夜亇弗力士村场景将会在若干年后成为后世津津乐道亇话题。故事结束了嘛？呒没，民众亇言语又开始多了起来。
有种人觉着要应该按照唐朝亇多元化发展模式，以后才能繁荣昌盛。 有种人觉着弗力士人终于醒悟了，晓得自家该哪能去做。 还有种人觉着英凡得国亇国民终于认识到自家亇错误，知错能改善莫大焉。
于是，双方重新制定了一系列合作政策，同时接受了队长从大唐带来亇各类商品和唐朝文化亇各类书籍，在村里临近亇山里建造了一座气势磅礴亇弗力士书院，以后将由吴语书院教书先生搭弗力士学堂老师共同为村里亇小囡属传授知识，每年还会派商队回访大唐首都长安，做到互相交流共同发展亇理念。
大圆满亇故事结局皆大欢喜，但是里向亇问题还是值得我伲深思，共勉共进说起来容易做起来就呒没介简单了，谢谢大家，下期见。