点击下方收听音频，时长5分51秒。
搭倷一道来传承母语，各位吴语书院亇听众朋友大家好，我是心毅，到之历史版块搭大家见面亇辰光哉。今朝由我带大家一道来讲讲童谣“米西米西炒咸菜”背后亇故事。
民国辰光，在上海滩有首童谣，叫
东洋人，到上海， 上海言话讲不来， 米西米西炒咸菜。
箇首形成于20年代亇童谣，实际上信息量是蛮大亇。单从字面意思来看是对日本人亇丑化，另外还透露两点信息：一是民国时代日本人上海言话讲得不好。二是日本人在上海有一定影响力，日本敬语使用连上海人都晓得。（“米西米西”是日本人“吃”亇敬语“召し上げる”亇音译。）因为当时上海是东亚最大亇城市，除脱英、法搭华人资本外，还有大批其他国家商人来华投资，其中就包括了日本人。
箇个辰光，日本人已经在做侵略中国亇准备，开始挑动华人反华人。日本企业工人有相当多拿了日本亇大洋去帮忙巡查维持上海公共租界亇社会秩序，当然也做了不少欺压中国人亇事体。党亇早期领导人瞿秋白笔下亇“四喜子”就箇个时期亇真实写照，伊每日拿“三十块日本洋钱”，看到马路上有中国人走过就拣当中软柿子捏。
而日本人企业亇特点是军事化味道比较重，搭今朝日资企业亇严谨、严格、加班多相比是过之而无不及。而作为上海市民主体亇江浙人，却却是另外一种风格。由于江浙市民文化成熟，市民社团多、工人组织强大，再加上西洋文化影响，日本企业亇文化显得与海派文化格格不入。因此，尽管日本企业工资高，但是江浙人到日本企业工作亇人邪气少；而且日本人也不大欢喜招江浙人，生怕工人搞运动。
由于国仇搭微妙亇地域、阶层等关系，再加上日本人企业模式得不到多数上海市民认可，因此产生了大量丑化日本人亇舆论，童谣就是其中之一。“米西米西炒咸菜”童谣抓牢日本人母语读音少、搭等级严明亇军事化管理方式，进行丑化。箇童谣流传相当广，在抗日战争前后亇一段辰光，是对中国人抗日士气是有帮助亇。但随之抗日战争日本人亇失败，日本企业也退出上海，箇只童谣亇典故也慢慢拨淡忘了。
解放以后，上海吴语环境稳定了下来。上海人拿凡是弗会吴语亇人侪戏称为乡下人，因此出现了“乡下人，到上海”之类亇变种，变得有眼“歧视色彩”，其实也只是小囡之间传唱，主要是搞白相。现在箇只童谣几乎消失了，消失是好事，以免造成误会，但也侧面说明了上海亇吴语环境一塌糊涂、一天世界了。